«ҚазАқпарат» ХАА ресми сайтында жарияланған ақпарат бойынша.

Қазақстанның 27 электр станциясында тариф 24%-ға дейін өседі. Бұл туралы ҚР Энергетика вице-министрі Жандос Нұрмағанбетов Орталық коммуникациялар қызметінің брифингінде мәлімдеді.

«Бүгінгі таңда Министрлік берілген өтінімдерге сәйкес 47 энергия өндіруші ұйымның 27-сі үшін электр энергиясына шекті тарифтерді түзеткен, олардың тарифтерінің орташа өсуі шамамен 24%-ды құрайды. Сонымен қатар, инвестицияларды қайтару лимитін 428 млрд теңгеге дейін ұлғайту бойынша заңнамаға тиісті түзетулер енгізілді, бұл жұмыс істеп тұрған станцияларды жаңғырту және кеңейту және реконструкциялау жөніндегі жобалар пулын ұлғайтуға мүмкіндік береді», – деді Ж.Нұрмағанбетов.

Сондай-ақ, вице-министр Мемлекет басшысының тапсырмасы бойынша 2022 жылдан бастап жүргізіліп келе жатқан Қазақстанның электр станцияларының ауқымды техникалық аудиті аясында KPMG бастаған халықаралық сарапшылар тобы барлығы 55 электр станциясын тексергенін хабарлады. Жылу станцияларының негізгі және қосалқы жабдықтарының техникалық жағдайына және оны пайдалану жағдайларына ерекше назар аударылды. Тексеру қорытындысы бойынша барлық станциялар жабдықтың техникалық жай-күйіне, пайдалану мерзімдеріне, отынның үлестік шығынының көрсеткіштеріне, апаттылыққа, персоналмен қамтылуға және жөндеу жұмыстарын орындауға байланысты санаттар бойынша бөлінді.

Бұған дейін Энергетика министрлігінің басшысы 1 шілдеден бастап Қазақстанда электр энергиясын бірыңғай сатып алушы жұмыс істей бастайтынын айтқан болатын.

Дереккөз: https://www.inform.kz/ru/tarif-uvelichitsya-pochti-na-chetvert-na-27-elektrostanciyah-kazahstana_a4073012